பொறுக்கி சாமியாரைக் காணவில்லை

""ஹலோ... நக்கீரன் சகோதரா... எமது குரல் அடையாளம் தெரிகிறதா? ஈலக வாழ்க்கையை துறந்து ஈடல் ஊனும் தன்மையை மறந்து...''

""ஹலோ... ஹலோ... பாளையம் சிகரெட் சாமியார் சங்கரலிங்க பித்தன்தானே...''

""என் பெயரைச் சொல்லி அங்கே நிறைய மோசடிகள்... அதனால் புறப்பட்டு விட்டோம். நாளைக் காலையில் தருமபுரி சுப்பிரமணியசாமி கோயில் அருகில் ஊன் பக்தர் வீட்டிற்கு வாருங்கள்'' கட் செய்தார் சாமியார்.
சிகரெட் புகை ஆசி வழங்கும் பொறுக்கிச் சாமியாரின் லீலைகள் 2.7.05 மற்றும் 16.7.05 இதழ்களில் புகைப்படங்களோடு வெளியானதை வாசகர்கள் மறந்திருக்க முடியாது.

22.9.05 காலையில் தருமபுரியில், சாமியார் சொன்ன முகவரியில் சந்தித்தோம்.
சிகப்புக்கரை வேட்டி, கட்டம் போட்ட சட்டை ஒரு காலை நீட்டி ஒரு காலை மடக்கியபடி... சிகரெட்டை அனுபவித்து இழுத்து உதியபடி "குந்தி' இருந்தார் சங்கரலிங்க சாமி... பக்கத்தில் புதிய பக்தர்கள்.

""பாளையத்தை விட்டு வந்ததற்கான காரணம் இதில் இருக்கிறது'' என்று ஒரு துண்டறிக்கை நோட்டீஸை நம்மிடம் நீட்டினார் ஒரு பக்தர். படித்தோம்.
தீர்த்தமலை பாளையத்தில் உள்ள சங்கரலிங்க திருத்தலத்திற்கும் அடியேனுக்கும் அசுர மனங்கள் கேடு விளைவித்து விட்டன.

மந்திரவாதிகளாலும் ரவுடிகளாலும், சோம்பேறிகளாலும் அடியேன் மனம் கலங்கிவிட்டது. அங்கே நடக்கும் முறைகேடுகளுக்கு நான் பொறுப்பல்ல...'' என்றிருந்தது.""அங்கே என்ன முறைகேடு நடந்தது. உங்க சிகரெட் வாயால சொல்லுங்க?'' என்றோம்.

""அமாவாசை, பௌர்ணமி நாட்கள்லதான் பாளையம் கோயில்ல நாம் தரிசனம் தந்தோம். மற்ற நாட்களில் வரும் பக்தர்களிடம் முகவரியை தாங்க... சாமியாரிடம் கொடுக்கிறோம்னு வாங்கியிருக்காங்க. பிறகு அந்த முகவரிக்கு போய் சாமியார் அனுப்பினார். உங்க வீட்ல தீயசக்தி இருக்கு.

அதை விரட்டணும் 5000 செலவாகும்னு பணம் வாங்கி இருக்காங்க. இப்படி நிறைய... என்னிடம் ஆசி வாங்க வந்த பெண்பக்தர்கள் எழுபேரின் கற்பை சூறையாடி இருக்கிறார்கள். இதையெல்லாம் அங்கேயிருக்கிற 7 பேர்தான் செய்திருக்கிறார்கள்'' தலையைக் குனிந்து கொண்டார் சிகரெட்.

""அங்கே உங்கள் சிஷ்யர் சந்திரசேகரன்... உங்களை இந்த ஊருக்கு அழைத்து வந்த அசோக்குமார் -வாசுகி தம்பதிதானே இருக்கிறார்கள். அவர்களா செய்தார்கள்?''

""யாருடைய பெயரையும் நாம் சொல்ல மாட்டோம். டி.எஸ்.பி. புகழேந்தியிடம் எல்லாவற்றையும் தெரிவித்து விட்டோம். விருப்பம் இல்லையென்றால் இங்கே இருக்க வேண்டாம் என்று கூறிவிட்டார். நாம் புறப்பட்டு விட்டோம்...'' சொன்ன சாமியார். சீறிப் பறந்துவிட்டார்.

அங்கிருந்தபடியே, பாளையத்திலுள்ள அசோக்குமார் வீட்டைத் தொடர்புகொண்டோம்.அசோக்குமார் மனைவி வாசுகி தான் பேசினார். சாமியாரின் குற்றச்சாட்டுகளை கூறினோம்.

"ஆமா... அப்படித்தான் எல்லார்ட்டயும் சொல்றாராம். நோட்டீஸ் அடிச்சிருக்காராம். சாமியார் நல்லவர்தான். அரசியல்வாதிகளும் பணக்காரங்களும்தான் அவரோட மனசை மாத்திட்டாங்க.

போன பவுர்ணமிக்கு முந்திய பவுர்ணமி அன்னிக்கி இங்கே வந்தார். தினம் தினம் பக்தர்கள் உங்களைப் பார்க்க இங்கே வந்து காத்துக்கிடக்கிறாங்க. நீங்க வி.ஐ.பி.கள் வீடுகளே கதியினு போறீங்களேனு என் கணவர் கொஞ்சம் கோபமா கேட்டுவிட்டார். உடனே கோவிச்சிக்கிட்டு கிளம்பினவர்தான்... அப்புறம் வரவேயில்லை.

மற்றபடி சாமியார் சொல்ற மாதிரி ஆங்கே தப்புத் தண்டா நடந்த மாதிரி தெரியலையே...'' வேதனைக்குரலில் சொன்னார் வாசுகி.

பொறுக்கி சாமியார் இப்ப எங்கே? என்று தேடிக்கொண்டிருக்கிறார்கள் பாளையம் பக்தர்கள்.